Мин борбуйбун көтөҕүөхпэр дылы эбэлээх эһэбэр иитиллибитим. Кинилэр аччыктаабыты аһатар, тоҥмуту ириэрэр сиэрдээх-майгылаах дьон этилэр. Эбэм Мотуруос оҕону хаһан даҕаны мөхпөт, таһыйбат буолара. Сэмэлээтэҕинэ кытаанахтык көрөн эрэ кэбиһэрэ. Ол биһигини сөп оҥороро. Сүрдээх минньигэс астаах, бөҕө-таҕа иистэх, сатабыллаах дьаһаллаах дьиэ кэргэн тутаах киһитэ этэ. Дэриэбинэҕэ биир эмит ыал олохторо огдолуйаары гыннаҕына оҥостон тиийэн тылын ылыннаран холбуура.
Чөркөөх орто оскуолалаах буолан атын нэһилиэктэртэн оҕо бөҕөтө кэлэн үөрэнэрэ. Биһиэхэ олорон үөрэммит киһи элбэх. Олорго барыларыгар ийэлии сыһыаннаһара. Аймахтарын, урууларын куруук өйүүрэ. Аҕам Егор Егорович этэрэ — Биһиги ийэбит үөрэхтээҕэ буоллар, Совмин бэрэсэдээтэлэ буолуо этэ — диэн. Кини кырдьык оннук киһи этэ.
Сааһыран баран саныыбын — Эбэлээх, эһэм барахсаттар дьиҥнээх Айыы дьоно эбиттэр. Миэхэ баар үтүө өрүттэрбин барытын кинилэр сахпыттар. Олохторун бүтүннүүтүн оҕолоругар анаабыттара. Эбэм — Түөһэйэн оҕолорбун эрэйдээбэккэ Орто Дойдуттан барыахпын наада уонна сир ириэнэҕэр өлөрүм буоллар, буорбун хаһалларыгар чэпчэки буолуо этэ — диэхтиирэ. Ити курдук оҕолоругар кыһанаахтыыра.
Билинҥи дьону уонна эбэлээх эһэм көлүөнэлэрин тэҥнээн көрдөхпүнэ биһиги төһө даҕаны баайдык-тоттук олордорбут сиэр-майгы өттүнэн таҥнары бардыбыт аҕай. Оччотооҕу сахалар киһини кырбыахтааҕай, улаханнык даҕаны саҥаралларын туттунар эбит буоллахтарына, билинҥи дьон байар туһуттан тугу да кэрэйбэттэр . Ону өссө киһиргээн сайынныбыт, былыр хаалыылаах олох этэ дэһээхтиибит.
Эбэм маллаах иһитэ
Эбэбиттэн тиксибит
Маллаах иһит мааныта
Ымыы буолан арчылыыр
Дьиэбин-уоппун, олохпун.
Кэриэс буолбут иһиттэн
Эбэм тыына илгийэр,
Өйдөөх өлүөр сүбэтэ
Иһирэхтик иһиллэр.
Күндү көмүс киһибит
Ыраас, дириҥ олоҕун
Ордорбокко, бүттүүнүн
Ыччатыгар биэрбитэ.
Эһээ буолан олорон
Ахтан-санаан кэлэбин —
Этирик түөскэр сыһыаран
Иэдэспиттэн сыллыыргын.
Эбэм маллаах иһитэ!
Тиэрдээр күндү киһибэр —
Күүтэр миигин сиэнчээним
Кууһан ылан сыллаары.
Егор Борисов — Буор Булгунньах
