Саха Өрөспүүбүлүкэтин күнүгэр, муус устар 27 чыһылатыгар 14:30 чааска «Саха» НКИХ эфиригэр Былатыан Ойуунускай 1917-1922 сылларга суруйбут «Ааспыт күннэр-дьыллар» диэн ахтыытын Саха сирин биллэр артыыстара уустаан-ураннаан дьүһүйүүлэрэ тахсар.
Саха сирин автономиятын ыларыгар биир тутаах оруоллаах улуу убайбыт Платон Алексеевич Ойуунускай бу суруйуута аан бастаан «Чолбон» сурунаал 1928 сыллааҕы 5-9 нүөмэрдэригэр бэчээттэммитэ. Ааҕааччы артыыстар бары Ойуунускай биир дойдулаахтара, ол курдук РФ үтүөлээх, СӨ норуодунай артыыһа Петр Баснаев, СӨ үтүөлээх артыыһа, РФ Судаарыстыбаннай бириэмийэтин лауреата Иннокентий Луковцев, СӨ культуратын туйгуна Роман Дорофеев, звукорежиссер Михаил Эверстов.
Бырайыак идиэйэтин ааптара, көҕүлээччитэ «Тааттавтодор» АО генеральнай директора Иван Бочонин, Бырайыак салайааччыта СӨ Ил Дарханын сүбэһитэ, «Улуу айаннар суолларынан» бырайыак салайааччыта Георгий Никонов, айар бөлөх: Анна Пудова, Гаврил Андросов, Валентина Бочонина, Дмитрий Никонов.
Улуу киһибитин аатырдар, кини олоҕун саҥа чопчуларын арыйар айымньы маннык курдук бэрт түргэнник оҥоһуллан тахсан күн сирин көрбүтүн иһин «Саха» НКИХ» СӨ ГБУ генеральнай дириэктэригэр Олег Марковка, генеральнай дириэктэр солбуйааччытыгар Ирина Ефимоваҕа, «Саха» НКИХ» СӨ ГБУ «Тэтим» араадьыйатын дириэктэригэр Николай Бястиновка айар бөлөх аатыттан махталбытын тиэрдэбит.
