Билиҥҥи туругунан суолу көрөр-истэр «Таттаавтодор» акционернай обществоҕа үлэ туһунан салайааччы Иван Иванович БОЧОНИН кылгастык маннык сырдатта:
Тэрилтэбит 3 учаастагынан үлэлиир – хамсыыр. Тутуу 2 учаастакка арахсар. Бастакы учаастагы Дмитрий Николаев, иккис учаастагы Дьулустаан Мандаров салайаллар. Дмитрий Николаевич салайар бөлөҕө «Мегинские автомагистрали» хааччахтаммыт эппиэтинэстээх тэрилтэҕэ субподрядка киирэн, бэйэбит кумахпытын таһан, 2.5 км сир болотунатын оҥоро сылдьар.
Дьулустаан Васильевич бөлөҕө суолу кытаатыннарыыга үлэлиир. Бу суолу кытаатыннарыы үлэтигэр кыһын Мохсоҕоллоох цементнэй собуотуттан 9000 тонна цемени таһан бэлэмнээбиппит.
Маны таһынан, суолу көрөр-истэр Савелий Михайлович Чашкин салайааччылаах үһүс учаастак диэн баар. Бу учаастакка отучча техника, оробуочайдар тохтоло суох үлэлииллэр, суолу-ииһи ыраастааһын, сэрэтэр бэлиэлэри туруоруу о.д.э.
Чурапчы улууһун Болтоҥо нэһилиэгиттэн Таатта улууһун Тыараһа нэһилиэгэр диэри 18 км асфальт суол оҥоһуллуохтаах. Бу суолга 2 бэдэрээтчик үлэлии сылдьар, «Сельдорстрой» ХЭТ уонна «Мегинские автомагистрали» ХЭТ, сакаасчыт «Бүлүүавтодор» ХЭТ (сал. Н.И.Андреев). Биһиги тэрилтэ манна субподрядка үлэлии сылдьабыт, кумаҕы кытта тааһы булкаас бэлэмнээн таһабыт. Бу сылга уопсайа 9 км суол асфальтынан бүрүллүөхтээх, хаалбыт кэрчик эһиил 2027 сылга түмүктэниэҕэ.
Манна диэн эттэххэ, суол алдьаныыта, 1988 сыллаахха тутуллубут, өрөмүөннэммэккэ турбут суолу улахан кыамталаах массыыналар тоҕута тэпсиилэрэ буолар. Иллэрээ сыл сайын үлэһиттэрбит суолга массыыналары соһоору, дьуһуурунайдаан хоноллор этэ. Былырыын Өрөспүүбүлүкэтээҕи Манчаары оонньууларын көрсө 4 тэрилтэ «Ресайклер» диэн техниканан цемени, кумаҕы, буору бииргэ булкуйан, бу булкадыһыгы 40 см халыҥнаах суолга кутан кытаатыннаран, көннөрөн оҥорон, массыына сырыыта харгыһы көрсүбэтэҕэ. Быйыл эмиэ бу көрүҥүнэн 20 км суолу тупсарыы үлэтэ күөстүү оргуйар.
Дьону – сэргэни долгутар тыын ыйытыктартан биирдэстэрэ суол буолар. Айан суола хаайтарыыта суох туруктаах буолуутун хааччыйар үлэлээх дьоммутугар тулууру, дьулууру баҕарыаҕыҥ.
Татьяна Захарова
