Алтынньы 7 күнүгэр оскуолабыт география кабинетыгар өр сылларга оскуолабытыгар учууталлаабыт, Уолба нэһилиэгин олохтоох сэбиэтин председателинэн үлэлээбит Аҕа дойду сэриитин ветерана биир дойдулаахпыт Дмитрий Егорович Никонов аатын иҥэрэр үөрүүлээх линейката буолан ааста. Дмитрий Егорович туһунан эркини уонна бэлиэни уола Георгий Дмитриевич Никонов оҥотторон оскуолабытыгар бэлэхтээтэ.
Дмитрий Егорович туһунан истиҥ ахтыылары иһиттибит. Зоя Петровна Боппосова учуутал быһыытынан сырдатта, Саргылана Романовна Мосоркина политическай пропагандист, лектор быһыытынан үлэтин кэпсээтэ. Мария Николаевна Басова сэбиэккэ председателинэн олус кыһамньылаах, эппиэтинэстээх үлэһит, утуе сүбэһит этэ диэн аҕынна.
Аймаҕа Николай Иннокентьевич Никонов геолог үлэтин туһунан кэпсиир буолара, бултуурун сөбүлүүрэ диэн кэпсээтэ. Оскуола үөрэнээччилэрэ Айсана Собакина, Хомустаан Афанасьев суруйбут дакылааттарынан иһитиннэрии оҥордулар.
«Дмитрий Егорович мин ийэм кырдьаҕас убайа, сааспыт тухары ыаллыы олорбуппут ,наһаа холку майгылаах киһи этэ. Урут аймаҕынан бырааһынньык аайы ыалынан, ыалга көһө сылдьан бырааһынньыктыыр идэлээх этилэр, сарсыардаттан остуол тула олорон бырааһынньыктыыллар этэ, ким урут астаан бүппүт ол ыҥырар эбит этэ, онно Дмитрий Егоровичтаахха элбэхтэ концерт көрдөрөн, оҕолор ол аайы убайбыт хаартысканан дьарыктанар буолан элбэх да хаартыска баара, альбомҥа оҕо сылдьан түспүт хаартыскаларбыт барыта кини түһэриитэ. Кэнники уу кээмэйдиир буолта, Таатта үрэххэ баран уу төһө эбиллибитин, түһүүтүн мээрэйдээн ханна эрэ отчуоттуур быһыылаах. Дьиэлэригэр сыалай биир хос библиотека этэ, паапкаларга арааһы бары бэлиэтэммитэ баара. Бу география кылааһыгар Дмитрий Егорович аатын иҥэрэргит саамай сөптөөх дии саныыбын».
— диэн Аида Ивановна Борисова ахтыы ыыппытын ааҕан иһитиннэрдибит.
Владимир Григорьевич, Светлана Ивановна Кусатовтар география уонна английскай предметтэрэ холбоһуктаах Аһаҕас уруогу олус сонуннук 7 кылаастарга ыыттылар.
Источник: МБОО Уолбинская СОШ / VK
