Бүгүн, олунньу 13 күнүгэр, үгэс быһыытынан 2024 сыл түмүгүнэн Алампа аатынан «Бастакы эрэдээктэр бириэмийэ» лауреаттарын бэлиэтээтибит. Сүрүн бириэмийэнэн Алампа Софронов аатынан «Бастакы эрэдээктэр бириэмийэтэ» буолар.
Бу дьоһун ааты туттарыыны 2019 сыллаахха Таатта улууһун Дьохсоҕон нэһилиэгин оччотооҕу баһылыга Петр Егорович Захаров өйөөн, бииргэ кыттыһан туттаран кэлбиппит. Үтүө бачыым холобур буолан, былырыын документалист-суруйааччы Д.Н. Гаврильев дьиэ кэргэнэ аҕаларын, эһэлэрин аатынан кыраайы үөрэтиигэ бириэмийэни олохтообуттара. Быйыл Горнай улууһун дьаһалтата уус-уран тылбааска СӨ норуодунай поэта С.И. Тарасов аатынан бириэмийэ туруорда.
Алампа Софронов аатынан «Бастакы эрэдээктэр» бириэмийэтин быйылгы партнерунан суруйааччы биир дойдулааҕа, Таатта улууһун Дьохсоҕон нэһилиэгиттэн төрүттээх Россия бочуоттаах суолу тутааччыта, СӨ транспорын үтүөлээх үлэһитэ Иван Бочонин салайааччылаах «Таттаавтодор» акциялаах уопсастыба буолла.
А.И. Софронов-Алампа аатынан «Бастакы эрэдээктэр» бириэмийэтин лауреаттарынан буоллулар:
— прозаҕа – Саха сирин суруйааччыларын сойууһун эдэр литератордарын сүбэтин чилиэнэ Наталия Рязанская «Саахар» сэһэнинэн (Амма улууһун Амма сэлиэнньэтэ);
— поэзияҕа – СӨ суруйааччыларын сойууһун чилиэнэ Ангелина Шадринова-Суоһааны «Ойуунускай оонньуута» поэматынан уонна «Былыргы аартык кырдьаҕас түүлэ кыаһаанын оргууй тыаһатар…» диэн Тыгын Дархаҥҥа уонна Марина Цветаеваҕа анаабыт хоһооннорун бөлөҕүнэн (Дьокуускай куорат);
— «Бастыҥ партнер» — СӨ Национальнай библиотеката (директор С.В. Максимова) «Чолбон өй күрэһэ. Улахан оонньуу» өрөспүүбүлүкэтээҕи бырайыак атаҕар турарыгар улахан көмөтүн иһин.
Бириэмийэлэри «Чолбон» сурунаал бас эрэдээктэрэ, Саха сирин суруйааччыларын сойууһун бэрэссэдээтэлэ Гаврил Андросов уонна «Тааттаавтодор» акциялаах уопсастыба генеральнай директорын экономикаҕа солбуйааччыта, СӨ бочуоттаах суолу тутааччыта Роман Ефимов туттардылар.
Сурунаал партнердара сылын ахсын элбииллэрэ олус үөрдэр.
СӨ өрөгөй ырыатын тылын айсыбыт СӨ норуодунай поэта, РФ уонна СӨ культураларын үтүөлээх үлэһитэ, Казахстан республикатын «Алаш» литератураҕа бириэмийэтин лауреата, СӨ Духуобунас Академиятын академига Савва Иванович Тарасов аатынан уус-уран тылбааска бириэмийэни төрөөбүт Горнай улууһун аҕа баһылыга Никита Андреев Россия суруйааччыларын сойууһун чилиэнигэр Анатолий Слепцовка Варлам Шаламов «Шерри-бренди» кэпсээнин тылбааһын иһин туттарда.
Документалист-суруйааччы Д.Н. Гаврильев аатынан кыраайы үөрэтиигэ бириэмийэ лауреатынан буолла тутулуга суох кыраайы үөрэтээччилэр түмсүүлэрин чилиэнэ, кыраайы үөрэтээччи Станислав Афанасьев «Саха аймах талба түгэнэ уонна Кривошапкин атыыһыт» ыстатыйатынан.
Ааҕар дьиэ кэргэттэри өйүүр, түмэр «Чолбон өй күрэһэ» оонньууга күүс-көмө буолбут СӨ Национальнай Библиотекатыгар, «САХА» НКИХ салалтатыгар уонна үлэһиттэригэр «Сахабэчээт» СӨ САТ махтал суруктарын генеральнай директор Ньургуйаана Михайловна Стручкова туттарда. Күүс-көмө буолар партнердарбытыгар «Чолбон махталын» бас эрэдээктэр Гаврил Гаврильевич Андросов «Тааттаавтодор» акциялаах уопсастыба генеральнай директорыгар Иван Бочониҥҥа, Горнай улууһун аҕа баһылыгар Никита Викторович Андреевка уонна СӨ адвокаттарын коллегиятын чилиэнигэр Мария Дмитриевна Гаврильеваҕа туттарда.
Текст: cholbon.space
Фото: Дмитрий Никонов, cholbon.space
